ఆంధ్రప్రదేశ్ రాజకీయాల్లో పెను సంచలనం సృష్టిస్తూ, డిప్యూటీ సీఎం పవన్ కల్యాణ్పై సుగాలి ప్రీతి తల్లి సుగాలి పార్వతీదేవి గన్నవరం పోలీస్ స్టేషన్లో లిఖితపూర్వకంగా ఫిర్యాదు చేశారు. గతంలో రాష్ట్రవ్యాప్తంగా తీవ్ర సంచలనం సృష్టించిన ‘సుగాలి ప్రీతి’ కేసు ఈ ఫిర్యాదుతో మళ్లీ తెరపైకి వచ్చింది.
హామీ ఇచ్చి మోసం చేశారు: ఎన్నికల ప్రచారంలో కూటమి ప్రభుత్వం అధికారంలోకి వచ్చాక, తాను డిప్యూటీ సీఎం అయ్యాక చేసే మొదటి సంతకం సుగాలి ప్రీతి కేసు ఫైలుపైనే ఉంటుందని పవన్ కల్యాణ్ పెద్ద మాటలు చెప్పారని, తీరా అధికారంలోకి వచ్చాక పూర్తిగా మాట మార్చారని పార్వతీదేవి ఆవేదన వ్యక్తం చేశారు.
రాజకీయ ప్రయోజనాల కోసమే: తన కుమార్తె మరణాన్ని పవన్ కల్యాణ్ కేవలం రాజకీయ ప్రయోజనాల కోసమే వాడుకుని, తమకు నమ్మకద్రోహం చేశారని ఆమె ఆరోపించారు.
కేసును పక్కదారి పట్టించడం: ఆధారాలు, డీఎన్ఏ లేవంటూ నిందితులకు క్లీన్ చిట్ ఇచ్చేలా మాట్లాడుతున్నారని, పవన్ కల్యాణ్పై చీటింగ్, నమ్మకద్రోహం, ఆదివాసీ బిడ్డ మరణంపై అసత్య ప్రచారాలు చేయడం వంటి సెక్షన్ల కింద చర్యలు తీసుకోవాలని డిమాండ్ చేశారు.
“ఒక యూట్యూబర్ను అరెస్ట్ చేయడానికి ప్రభుత్వం వందల మంది పోలీసులను, నాలుగు జిల్లాల ఎస్పీలను రంగంలోకి దించింది. ఆ కేసుపై పెట్టిన శ్రద్ధలో కనీసం 10 శాతం శ్రద్ధ మా కూతురి కేసుపై పెట్టి ఉంటే ఈపాటికే మాకు న్యాయం జరిగేది. మా కళ్ల ముందే నిందితులు స్వేచ్ఛగా తిరుగుతున్నారు.”
